जालना जिल्ह्यात बांधकाम कामगार कल्याण मंडळाच्या संच वितरणात अनियमितता?
भोकरदन शिबिरात नोंदणी करूनही संच न मिळाल्याची तक्रार
जालना, दि. ०३ नोव्हेंबर २०२५:
महाराष्ट्र इमारत व इतर बांधकाम कामगार कल्याण मंडळाच्या गृहपयोगी संच (३० भांडी संच) वितरण योजनेत अनियमिततेची गंभीर बाब समोर आली आहे. भोकरदन तालुक्यातील कामगार पृथ्वीराज दशरथ राजपूत (नोंदणी क्र. MH191720050927) यांनी २३ ऑक्टोबर रोजी मार्केट कमिटी गोडाऊन येथे झालेल्या मंडळाच्या शिबिरात बायोमेट्रिक नोंदणी पूर्ण केली; मात्र त्यांना संच देण्यात आला नाही.
कामगार राजपूत यांनी सांगितले की, “शिबिरात अंगठ्याचा ठसा, फोटो सर्व प्रक्रिया पूर्ण झाली. पण संच देण्यात आला नाही. दुसऱ्या दिवशी विचारणा केली असता समाधानकारक उत्तर मिळाले नाही. मजुरी करून कुटुंब चालवतो, हा संच मिळाला असता तर मोठा दिलासा मिळाला असता.”
याबाबत सामाजिक कार्यकर्ते राहुल सत्यनारायणजी करनाडे यांनी मंडळाच्या जालना कार्यालयाकडे तक्रार दाखल केली आहे. त्यांनी या प्रकरणाची चौकशी करून लाभार्थ्यांना संच देण्याची मागणी केली आहे.
या संदर्भात सामाजिक कार्यकर्ते विजय ओमप्रकाश भगत म्हणाले, “ही एक-दोन व्यक्तींची समस्या नाही. राजूर, भोकरदन, परतूर, मंठा, बदनापूर, अंबड, घनसावंगी व जालना शहरासह अनेक ठिकाणी कामगारांना संच मिळालेले नाहीत. मंडळाने तातडीने चौकशी करून संच वाटप करावे, अन्यथा आंदोलन उभारणार आहोत.”
कामगारांच्या म्हणण्यानुसार, मंडळाच्या नियमावलीप्रमाणे शिबिरात नोंदणी झाल्यानंतर आवश्यक साहित्य त्वरित देणे अपेक्षित असते. मात्र जालना जिल्ह्यात या योजनेत अनियमितता वाढल्याचा आरोप होत आहे.