खंडोबा यात्रेत बारा गाड्यांखाली दबून तरुणाचा मृत्यू; एक जण गंभीर जखमी
घनसावंगी प्रतिनिधी
जालना जिल्ह्यातील घनसावंगी तालुक्यातील राजाटाकळी येथे चंपाषष्ठी निमित्त भरलेल्या खंडोबा रायाच्या यात्रेदरम्यान बारा गाड्या ओढण्याच्या पारंपरिक कार्यक्रमात एक हृदयद्रावक घटना घडली. बुधवार, २६ नोव्हेंबर रोजी सायंकाळच्या सुमारास या कार्यक्रमादरम्यान चारगाड्या अंगावर गेल्यामुळे सुंदर दत्तात्रय काळे (वय ४०) या तरुणाचा दुर्दैवी मृत्यू झाला असून नृसिंह काळे हे गंभीर जखमी झाले आहेत.
घटनेनंतर उपस्थितांनी तत्काळ मदतीसाठी धाव घेतली. सुंदर काळे यांना घनसावंगी येथील उपजिल्हा रुग्णालयात तातडीने दाखल करण्यात आले. मात्र डॉक्टरांनी तपासणीअंती त्यांना मृत घोषित केले. मृतदेहाचे तेथेच शवविच्छेदन करून गुरुवारी त्यांच्या पार्थिवावर शोकाकुल वातावरणात अंत्यसंस्कार करण्यात आले.
दरम्यान, नृसिंह काळे हेही या दुर्घटनेत गंभीर जखमी झाले असून त्यांच्या हाताला आणि पायाला जबर मार लागला आहे. त्यांना पुढील उपचारासाठी जालना येथील रुग्णालयात हलविण्यात आले आहे.
या घटनेने घनसावंगी तालुक्यासह राजाटाकळी व परिसरात शोककळा पसरली असून यात्रेचा उत्साह क्षणात शांत पडला आहे. सुंदर काळे यांच्या निधनाने गावात हळहळ व्यक्त होत आहे.