मंडळ अधिकारी प्रवीण रुईकर व तलाठी चेतन पारचा यांचे मनमानी कारभार उपविभागीय अधिकारी व जिल्हाधिकारी थांबवणार का?,शेतकऱ्याला न्याय देणार का?
प्रतिनिधी / जालना :तालुक्यातील सावंगी तलान येथील सर्वे क्रमांक ३६ व गट क्रमांक १७० मधील तब्बल १९ शेतकऱ्यांची नावे सातबारा उताऱ्यावरून वगळण्यात आल्यामुळे शेतकरी अतिवृष्टी अनुदानासह शासकीय योजनांपासून वंचित राहिले आहेत.यामुळे या शेतकऱ्यांवर उपासमारीची वेळ आली असून,संबंधित तलाठी सी.आर.पारचा व मंडळ अधिकारी रूईकर व तहसीलदार यांच्यावर कठोर कारवाईची मागणी उपविभागीय अधिकारी जालना व जिल्हाधिकारी जालना यांना शेतकऱ्यांनी भेट घेऊन निवेदनाद्वारे मागणी करण्यात आली आहे.
या प्रकरणासंदर्भात शेतकऱ्यांनी उपविभागीय अधिकारी जालना आणि जिल्हाधिकारी जालना यांना निवेदन दिले असून,त्यात सांगण्यात आले आहे की, गेल्या पाच वर्षांपासून भूमी अभिलेख कार्यालयात प्रकरण प्रलंबित होते.याबाबतचे निर्णय दोन वेळा सखा शामा राठोड व सूर्यभान बाला राठोड यांच्या वारसांच्या बाजूने लागले होते.तरीदेखील,राजकीय दबाव व आर्थिक व्यवहारांच्या जोरावर काही व्यक्तींनी तलाठी व मंडळ अधिकाऱ्यांना भुलवून चुकीचे आदेश काढण्यास प्रावृत्त केले,असा आरोप शेतकऱ्यांनी केला आहे.
तसेच निवेदनानुसार,ज्ञानदेव सिताराम राठोड,काशिनाथ प्रतापसिंग राठोड,राजू असाराम राठोड,अंजेभाऊ उत्तम राठोड,सिताराम प्रताप राठोड,उत्तम सुंदरसिंग राठोड यांनी मिळून राजकीय दबावाचा गैरवापर करत प्रत्येक शेतकऱ्यांची नावे सातबाऱ्यावरून काढली आहे.तसेच प्रतापसिंग धुपसिंग राठोड व सुंदरसिंग धुपसिंग राठोड यांची नावे कोणत्याही कायदेशीर आधारे न घेता सातबाऱ्यावर समाविष्ट करण्यात आली,असा गंभीर आरोप करण्यात आला आहे.
शेतकऱ्यांनी निवेदनात पुढे म्हटले आहे की, चुकीचे दस्तावेज सादर करून शासन व प्रशासनाची फसवणूक करण्यात आली आहे,त्यामुळे संबंधितांवर गुन्हा दाखल करून फेर क्रमांक ८४६ रद्द करण्यात यावा आणि मूळ १९ शेतकऱ्यांची नावे पुनःस्थापित करावीत.तसेच नामदेव सिताराम राठोड,संजय उत्तम राठोड आणि ईतर काही शेतकऱ्याची जमीन ही पाटबंधारे विभाग वसाहतीसाठी संपादित असल्याने सातबाऱ्यावरून ती नोंदही कमी करण्यात यावी,अशी मागणी करण्यात आली आहे.
निवेदनात असा इशारा देण्यात आला आहे की,वरील १९ शेतकऱ्यांच्या जिवाला काहीही अनिष्ट घडल्यास जबाबदारी तलाठी,मंडळ अधिकारी व तहसीलदार यांची राहील.या निवेदनावर परसराम सखाराम राठोड,हरिचंद बाला राठोड,बाबासाहेब विश्वनाथ राठोड,रमेश हरिदास राठोड,कौशल्याबाई प्रेमसिंग जाधव,बाबु सखाराम राठोड,देविचंद बाला राठोड,आंबादास हरिदास राठोड,दिलीप श्रीचंद राठोड,निवास भगवान राठोड,शुभम राठोड आदींसह एकूण १९ शेतकऱ्यांच्या निवेदनावर स्वाक्षऱ्या आहेत.
या शेतकऱ्यांनी चुकीच्या पद्धतीने नावे वगळणाऱ्या अधिकाऱ्यांवर कारवाई करावी.तसेच फेर क्रमांक ८४६ रद्द करून मूळ नोंदी पुनःस्थापित कराव्यात व संबंधितांवर फौजदारी गुन्हे दाखल करावेत अश्या मागण्या केल्या आहेत.तर या घटनेमुळे सावंगी तलान परिसरातील शेतकऱ्यांमध्ये तीव्र संताप असून,प्रशासनाच्या निष्काळजीपणाबद्दल तीव्र नाराजी व्यक्त केली जात आहे.