पाय घसरून शेततळ्यात पडल्याने तरुण शेतकऱ्याचा दुर्दैवी मृत्यू
भोकरदन तालुक्यातील मनापूर येथील घटना सर्वत्र हळहळ
भोकरदन दि प्रतिनिधी-
भोकरदन तालुक्यातील मनापूर गावात सोमवारी (दि. ३ नोव्हेंबर) सकाळी घडलेल्या हृदयद्रावक घटनेत भाऊसाहेब काशिनाथ दळवी (वय ४०) या तरुण शेतकऱ्याचा शेततळ्यात पडून मृत्यू झाला. कामानिमित्त शेतात गेलेल्या दळवी यांचा पाय घसरल्याने ते तळ्यात पडले आणि त्यांचा जागीच मृत्यू झाला, अशी प्राथमिक माहिती मिळाली आहे.
मिळालेल्या माहितीनुसार, सोमवारी सकाळी सुमारे अकराच्या सुमारास दळवी आपल्या शेतातील तळ्याकाठी काम करत असताना अचानक पाय घसरून ते पाण्यात पडले. काही वेळानंतर ते दिसेनासे झाल्याने कुटुंबीय आणि शेजारी शेतकरी यांनी शोध घेतला. तळ्याच्या पाण्यात ते आढळून आल्यानंतर तातडीने त्यांना बाहेर काढून भोकरदन येथील ग्रामीण रुग्णालयात दाखल करण्यात आले. मात्र वैद्यकीय अधिकाऱ्यांनी तपासून त्यांना मृत घोषित केले.
या घटनेची माहिती मिळताच मनापूर गावात शोककळा पसरली. परिसरातील नागरिक, शेतकरी आणि नातेवाईक मोठ्या संख्येने ग्रामीण रुग्णालयात दाखल झाले होते. तरुण व कष्टाळू म्हणून ओळखले जाणारे भाऊसाहेब दळवी यांच्या अकस्मात निधनाने सर्वत्र हळहळ व्यक्त होत आहे.
दळवी यांच्या पश्चात आई-वडील, पत्नी, तीन मुली, एक मुलगा, दोन भाऊ असा मोठा परिवार आहे. त्यांच्या मृत्यूमुळे परिवारावर दुःखाचा डोंगर कोसळला आहे.
गावात तसेच भोकरदन परिसरात या घटनेची चर्चा असून “कष्टाच्या रगाड्यात आयुष्य घालवणाऱ्या शेतकऱ्याचा असा दुर्दैवी अंत होऊ नये” अशी भावना ग्रामस्थांनी व्यक्त केली आहे.