अनैतिक संबंधास अडथळा ठरणाऱ्या पतीचा दिराच्या मदतीने काढला काटा
स्लग: बदनापूर तालुक्यातील सोमठाणा येथील खळबळजनक घटना: दीर-भावजयी गजाआड
बदनापूर/प्रतिनिधी :
बदनापूर तालुक्यातील सोमठाणा येथे अनैतिक संबंधातून पत्नीने लहान्या दिराच्या मदतीने स्वत:च्या पतीचा खून केल्याची धक्कादायक घटना उघडकीस आली आहे. पोलिसांच्या कसून तपासानंतर या हत्येचा उलगडा झाला. संशयित दीर-भावजायीस पोलिसांनी अटक केली असून, न्यायालयाने त्यांना तीन दिवसांची पोलीस कोठडी सुनावली आहे. या घटनेनंतर परिसरात खळबळ उडाली आहे.
या खळबळजनक घटनेविषयी पोलीस निरीक्षक एम.टी.सुरवसे यांनी सांगितले, की दि.१२ नोव्हेंबर रोजी सकाळच्या सुमारास बदनापूर पोलिस ठाण्याच्या हद्दीतील निकळक शिवारामधील वाला-सोमठाणा तलावात प्लास्टिकच्या पोत्यामध्ये एक अनोळखी पुरुषाचे प्रेत आढळून आले. माहिती मिळताच पोलीस निरीक्षक एम. टी. सुरवसे हे तत्काळ पोलिस पथकासह घटनास्थळी पोहोचले. स्थानिक नागरिकांच्या मदतीने प्रेत बाहेर काढून त्याची ओळख पटवण्यात आली असता, ते प्रेत परमेश्वर रामनाथ तायडे (वय ३०,रा.सोमठाणा) याचे असल्याचे निष्पन्न झाले. प्राथमिक चौकशीत मृतदेहावर गंभीर मारहाण व कुराडीचे वार असल्याचे आढळले. त्यानंतर मृताच्या वडिल रामनाथ तायडे (वय ५६, रा. सोमठाणा) यांनी पोलिसांत तक्रार दाखल केली. त्यावरून बदनापूर पोलिस ठाण्यात अज्ञातांविरुध्द खुनाचा गुन्हा नोंद करण्यात आला. तपासादरम्यान पोलिसांनी संशयाच्या आधारे मृताचा लहान भाऊ ज्ञानेश्वर तायडे (वय २८) व मृताची पत्नी मनिषा परमेश्वर तायडे (वय २५) यांना ताब्यात घेतले. चौकशीत दोघांनीही गुन्ह्याची कबुली दिली. बदनापूर पोलिसांनी दोन्ही आरोपींना अटक करून पुढील तपास सुरू केला आहे. पोलीस अधीक्षक अजयकुमार बन्सल, अप्पर पोलीस अधीक्षक आयुष नोपाणी, उपविभागीय पोलीस अधिकारी अनंत कुलकर्णी यांच्या मार्गदर्शनाखाली पोलीस निरीक्षक एम.टी. सुरवसे, सहायक निरीक्षक अविनाश राठोड, उपनिरीक्षक संतोष कुकलारे, इस्माईल शेख, अब्दुल बारी, प्रीती जाधव, गोपाळ बारवाल व राम सानप यांनी ही कारवाई केली.