खेडलेझुंगे येथे गुटखा आणि गावठी दारूचा साठा जप्त ; लासलगाव पोलिसांची सलग कारवाई ; दोघांविरुद्ध गुन्हे दाखल
जनार्दन चव्हाण
विंचूर :- लासलगावच्या पोलिस पथकाने खेडलेझुंगे परिसरात सलग दोन कारवायांमध्ये राज्य शासनाने बंदी घातलेल्या गुटख्याचा तसेच बेकायदा गावठी हातभट्टी दारूचा साठा जप्त केला आहे. दोन्ही प्रकरणांत दोन आरोपींविरुद्ध गुन्हे दाखल करण्यात आले आहेत.
पहिल्या कारवाईत, दि.३ नोव्हें रोजी दुपारी एक वाजेच्या सुमारास पोलिसांनी खेडलेझुंगे येथील योगीराज हॉटेल वर छापा टाकला असता आरोपी अरुण अशोक गिते, वय ४० याने राज्य शासनाने बंदी घातलेल्या विविध कंपन्यांचा सुगंधित पानमसाला, गुटखा आणि जर्दा याचा साठा आढळून आला. पोलिसांनी घटनास्थळावरून ८०३० रुपये किंमत असलेला डायरेक्टर, गोवा, विमल, शॉट, राजनिवास, जी-१ आणि आर.एन.०१ या ब्रँडचा गुटखा व पानमसाला जप्त केला. महाराष्ट्र शासनाच्या १८ जुलै २०२३ च्या अधिसूचनेनुसार या उत्पादनांच्या विक्री आणि साठवणीवर बंदी असतांनाही आरोपीने स्वतःच्या आर्थिक फायद्यासाठी मानवी आरोग्यास अपायकारक पदार्थ विक्रीसाठी ठेवले असल्याचे तपासात निष्पन्न झाले. त्यामुळे पो.शिपाई दगू शिंदे यांच्या फिर्यादीवरून त्याच्याविरुद्ध भा.न्या.सं. २०२३ च्या कलम १२३, २२३, २७४ व २७५ अन्वये गुन्हा दाखल करण्यात आला आहे.
दुसऱ्या कारवाईत, याच पथकाने खेडलेझुंगे परिसरात छापा टाकून बेकायदा गावठी हातभट्टी दारूचा साठा जप्त केला. यावेळी आरोपी ज्ञानेश्वर पुंडलीक लोखंडे, वय ३९ हा आपल्या राहत्या घराच्या मागे दारू साठवून ठेवत असल्याचे आढळले. पोलिसांनी १८ लिटर दारू, मुद्देमाल किंमत १,८०० रु.जप्त केली. या प्रकरणी पोलीस शिपाई दगडू श्रवण शिंदे यांनी फिर्याद दिली असून आरोपीविरुद्ध महाराष्ट्र दारूबंदी अधिनियम १९४९ च्या कलम ६५ (ई) अन्वये गुन्हा दाखल करण्यात आला आहे.
या कारवायांमध्ये पो.हवा.संदीप शिंदे, पो.शि.दगडू शिंदे, सागर आरोटे, अरुण डोंगरे आदींचा सहभाग होता. स.पो.नि भास्करराव शिंदे यांचे मार्गदर्शनाखाली पो.उ.नि.किसन पवार व पो.हवा. संदीप शिंदे अधिक तपास करीत आहेत. लासलगाव पोलिसांच्या या सलग आणि प्रभावी कारवाईमुळे अवैध धंदे करणाऱ्यांमध्ये खळबळ उडाली असून, स्थानिक नागरिकांकडून पोलिसांच्या तत्परतेचे आणि दक्षतेचे कौतुक व्यक्त केले जात आहे.