निफाड तालुक्यात शेतकऱ्यांच्या आत्महत्यांचे सत्र सुरूच!
आठवड्यातील दुसरी घटना ; नापिकी व कर्जाच्या ओझ्याला कंटाळून वयोवृद्ध शेतकऱ्याची आत्महत्या
निफाड, दि. ४ नोव्हेंबर :
गेल्या काही महिन्यांपासून पडत असलेल्या अवेळी पावसामुळे शेतीपिकांचे मोठे नुकसान झाले असून, निफाड तालुक्यातील शेतकरी आर्थिक विवंचनेत सापडले आहेत. “उत्पन्न नाही, कर्जाचा बोजा वाढतोय, घर कसं चालवायचं?” या प्रश्नाने अस्वस्थ झालेल्या शेतकऱ्यांमध्ये नैराश्य वाढत चालले आहे. परिणामी, आत्महत्यांचे सत्र थांबण्याचे नाव घेत नाही.
कालच उगाव येथील एका शेतकऱ्याने आत्महत्या केल्याची घटना ताजी असतानाच, आज पुन्हा पाचोरे वणी (ता. निफाड) येथील रंगनाथ नामदेव वाटपाडे (वय ७५) या वयोवृद्ध शेतकऱ्याने विष प्राशन करून जीवन संपवल्याची धक्कादायक घटना घडली.
मिळालेल्या माहितीनुसार, वाटपाडे यांच्या शेतातील टोमॅटो पिकाला समाधानकारक भाव न मिळाल्याने, तर नुकत्याच झालेल्या अतिवृष्टीमुळे लाल कांदा आणि कांदा रोपं पूर्णपणे नष्ट झाल्याने ते अत्यंत हताश झाले होते. काही दिवसांपूर्वी त्यांनी द्राक्षबागेची छाटणी केली होती, मात्र झाडांवर द्राक्षमाल न दिसल्याने त्यांचे मनोबल पूर्णपणे खचले.
घरच्यांच्या म्हणण्यानुसार, “शेतातून काहीच उत्पन्न नाही, आता घर चालवायचं कसं?” अशी व्यथा ते गेल्या काही दिवसांपासून बोलत होते. वाढत्या कर्जाचा आणि शासनाच्या कर्जमाफीसंबंधी उदासीन धोरणाचा कंटाळा येऊन, त्यांनी राहत्या घरालगतच्या द्राक्षबागेत विषारी औषध प्राशन करून आत्महत्या केली.
या घटनेची आकस्मिक मृत्यूची नोंद पिंपळगाव बसवंत पोलिस ठाण्यात करण्यात आली आहे. रंगनाथ वाटपाडे यांच्या पश्चात दोन विवाहित मुले व तीन मुली असा परिवार आहे.
या घटनेने संपूर्ण पाचोरे वणी परिसरासह निफाड तालुक्यात शोककळा पसरली आहे.